KO‘KRAK SARATONI DAVRIDA PSIXOSOTSIAL YORDAMNI O‘Z ICHIGA OLGAN INTEGRATSIYALASHGAN PARVARISH STRATEGIYALARI

Abstract

Ko‘krak saratoni ayollarda eng ko‘p uchraydigan onkologik kasallik bo‘lib, uning jismoniy ta’siridan tashqari ruhiy salomatlikka ham salbiy ta’siri mavjud. Bemorlar ko‘pincha depressiya, tashvish, stress, ijtimoiy izolyatsiya va hayot sifatining pasayishi kabi psixologik muammolar bilan yuzlashadilar. Shu sababli, ko‘krak saratoni bilan og‘rigan bemorlarga ko‘rsatiladigan yordam faqat jismoniy davolashdan iborat bo‘lishi yetarli emas. Mazkur maqolada psixosotsial yordamni o‘z ichiga olgan integratsiyalashgan parvarish strategiyalarining ahamiyati va samaradorligi klinik tadqiqotlar va tizimli sharhlar asosida tahlil qilinadi. Integratsiyalashgan parvarish modeli, ya’ni multidisipliner yondashuv, bemorning jismoniy, ruhiy va ijtimoiy ehtiyojlarini bir vaqtning o‘zida qondirishga qaratilgan bo‘lib, bu yondashuv ko‘krak saratoni bilan bog‘liq psixologik simptomlarni kamaytirish, davolanish jarayoniga rioya qilishni oshirish va hayot sifatini yaxshilashda muhim omil hisoblanadi. Maqolada kognitiv-xulq-atvor terapiyasi, qo‘llab-quvvatlash guruhlari, stressni boshqarish texnikalari va boshqa psixosotsial aralashuvlarning samaradorligi tahlil qilinib, ularning bemorlar uchun klinik ahamiyati ko‘rsatib o‘tiladi. Shu bilan birga, zamonaviy tibbiyot amaliyotida integratsiyalashgan parvarish yondashuvlarini kengaytirish va takomillashtirish zarurati muhokama qilinadi.