Овулятор дисфункция билан боғлиқ бачадондан аномал қон кетишда гормонал дисбаланснинг клиник ва прогностик ўрни

Abstract

Ушбу проспектив тадқиқотда овулятор дисфункция билан боғлиқ бачадондан аномал қон кетиш (БАҚК-О) билан мурожаат этган 18–41 ёшдаги 120 нафар аёлда гормонал кўрсаткичлар, эхографик ва морфофункционал параметрлар таҳлил қилинди. FIGO PALM–COEIN классификацияси асосида баҳолаш натижасида ФСГ даражасининг изчил ошиши, ЛГ/ФСГ нисбатининг пасайиши, эстрадиол ва прогестерон даражаларининг кескин камайиши, пролактин ва ТТГ кўрсаткичларининг ортиши аниқланди (p<0,05). Корреляцион таҳлил ФСГ ва тухумдон ҳажми ўртасида салбий, эстрадиол ва эндометрий қалинлиги ҳамда прогестерон ва доминант фолликул ривожланиши ўртасида мусбат боғлиқлик мавжудлигини кўрсатди. ROC таҳлил натижалари ишлаб чиқилган прогнозлаш модели клиник амалиётда юқори хавфли беморларни аниқлашда юқори диагностик самарадорликка (AUC=0,81) эгалигини тасдиқлади. Тадқиқот натижалари БАҚК-О патогенезида гормонал дисбаланснинг етакчи аҳамиятга эгалигини кўрсатади.