Эндометрий дисфункцияси билан боғлиқ бепушт аёлларда иммуногистохимик маркерларининг рецептивлик ва имплантация самарадорлигини прогнозлашдаги аҳамияти

Abstract

Резюме. Кириш. Бепуштлик репродуктив ёшдаги аёлларда кенг тарқалган бўлиб, унинг сабаблари орасида эндометрий дисфункцияси муҳим ўрин тутади. Эндометрий рецептивлиги бузилиши имплантация самарадорлиги ва ҳомиладорлик кўрсаткичларини пасайтиради. Мақсад. Эндометрий дисфункцияси билан боғлиқ бепушт аёлларда BCL6, CXCL13 ва ZBTB16 иммуногистохимик маркерларининг экспрессиясини баҳолаш ҳамда уларнинг рецептивлик ва имплантация самарадорлигини прогнозлашдаги аҳамиятини аниқлаш. Материал ва усуллар. Тадқиқотга 120 нафар аёл жалб этилди: I-гуруҳ – эрта репродуктив ёшдаги 40 нафар бепушт аёл, II-гуруҳ – кеч репродуктив ёшдаги 50 нафар бепушт аёл, таққослаш гуруҳи – 30 нафар соғлом аёл. Эндометрий биопсиялари иммуногистохимик бўяш (BCL6, CXCL13, ZBTB16) асосида таҳлил қилинди. Экспрессия даражалари 0–3 баллик шкалада баҳоланди. Статистик ишлов SPSS 26.0 дастури орқали амалга оширилди (χ², корреляция, ROC-анализ). Натижалар. Беморларда BCL6 (47,5–54,0%), CXCL13 (45,0–52,0%) ва ZBTB16 (42,5–50,0%) юқори экспрессияси назорат гуруҳига нисбатан ишончли кўп қайд этилди (p<0,05). Юқори экспрессия ҳолларида эндометрийда яллиғланиш, эпителиал дисфункция ва морфологик ўзгаришлар устун бўлди. Корреляция таҳлили BCL6 (r=–0,62), CXCL13 (r=–0,64) ва ZBTB16 (r=–0,59) экспрессияси билан рецептивлик ўртасида кучли салбий боғлиқлик мавжудлигини кўрсатди (p<0,01). ROC-анализ натижаси AUC=0,84; сезгирлик – 86,1%; спецификлик – 83,3% эканлигини кўрсатди. Хулоса. BCL6, CXCL13 ва ZBTB16 маркерлари экспрессиясининг юқорилиги эндометрий рецептивлигини пасайиши ва имплантация самарадорлигини камайиши билан боғлиқ. Ушбу маркерлар эндометрий дисфункцияси билан боғлиқ бепушт аёлларда эрта диагностика ва прогнозлаш учун истиқболли биомаркер сифатида тавсия этилади.