Репродуктив тизим микробиотаси дисбиози билан боғлиқ бепушт аёлларда эхографик тадқиқот натижалари

Abstract

Резюме. Кириш. Репродуктив тизим микробиотаси дисбиози аёлларда бепуштликнинг долзарб омилларидан бири ҳисобланади. Микробиота мувозанатининг бузилиши эндометрий рецептивлиги, овуляция самарадорлиги ва имплантация жараёнига салбий таъсир кўрсатиши мумкин. Мақсад. Репродуктив тизим микробиотаси дисбиози билан боғлиқ бепушт аёлларда эхографик кўрсаткичларни баҳолаш ва уларнинг репродуктив функция билан боғлиқлигини аниқлаш. Материали ва усуллари. 2022–2025 йилларда олиб борилган проспектив тадқиқотда 120 нафар репродуктив ёшдаги (18–40 ёш) бепушт аёл текширилди. Иштирокчилар тўрт гуруҳга ажратилди: I — қин ва цервикал канал дисбиози (n=30), II — эндометрий ва бачадон найлари дисбиози (n=30), III — тухумдон дисбиози (n=30), IV — назорат гуруҳи (n=30). Барча иштирокчиларда трансвагинал УТТ ва фолликулометрия ўтказилди, эндометрий қалинлиги ва тухумдон кўрсаткичлари баҳоланди. Натижалар. Қин–цервикал канал дисбиозида эндометрий рецептивлиги қисман бузилган бўлса (антрал фолликуллар сони 6,7±1,3), эндометрий–найлар дисбиозида эндометрий қалинлиги сезиларли пасайди (7,4±1,2 мм; p<0,001). Тухумдон дисбиозида энг кучли ўзгаришлар қайд этилди: антрал фолликуллар сони 3,5±1,1 (p<0,001), овуляция 40% ҳолатда. Корреляцион таҳлил тухумдон дисбиози ва антрал фолликуллар сони ўртасида кучли салбий боғлиқликни кўрсатди (r=–0,52; p<0,01). Хулоса. Микробиота дисбиози бепушт аёлларда эхографик кўрсаткичлар билан яқин боғлиқ бўлиб, айниқса тухумдон ва эндометрий дисбиозлари репродуктив функцияга кучли салбий таъсир кўрсатади.