Предменструал синдром кечишини прогнозлашда клиник-гормонал маркерларнинг аҳамияти

Abstract

Кириш. Предменструал синдром (ПМС) репродуктив ёшдаги аёллар орасида кенг тарқалган нейроэндокрин патология бўлиб, унингклиник кечиши ва оғирлик даражаси гормонал регуляция ҳолатига боғлиқ. ПМС кечишини прогнозлаш учун ишончли клиник ва гормонал маркерларни аниқлаш долзарб ҳисобланади. Тадқиқот мақсади. Турли репродуктив ёшдаги аёлларда предменструал синдром кечишини прогнозлашда клиник белгилари ва гормонал маркерларнинг аҳамиятини баҳолаш. Материал ва усуллар.Тадқиқот проспектив клиник-кузатув дизайнида ўтказилиб, 120 нафар аёл жалб этилди. Иштирокчилар эрта, ўрта ва кеч репродуктив ёш гуруҳларига ҳамда назорат гуруҳига ажратилди. ПМС оғирлиги DRSP шкаласи ва ACOG мезонлари асосида баҳоланди. Лютеин фазасида эстрадиол, прогестерон ва пролактин даражалари аниқланди. Статистик таҳлил ANOVA, Spearman корреляцияси ва логистик регрессия усуллари ёрдамида ўтказилди. Натижалар. ПМС клиник оғирлиги репродуктив ёш ортиши билан ишончли равишда ошди (p<0,001). Прогестерон даражасининг пасайиши ва пролактин гиперсекрецияси ПМС оғир кечиши билан боғлиқ экани аниқланди. DRSP балли прогестерон билан манфий (r = –0,62), пролактин билан мусбат (r = 0,58) корреляцияга эга бўлди. Прогестерон <10нг/мл ва пролактин >500 мМЕ/л ПМС оғир кечишининг мустақил прогностик омиллари сифатида аниқланди. Хулоса. Клиник-гормонал маркерларнинг комплекс баҳоланиши ПМС кечишини индивидуал прогнозлаш ва шахсийлаштирилган коррекция стратегияларини ишлаб чиқиш имконини беради.