Ҳомила ўсишини чегараланиш синдромини эрта аниқлашда эхографик ва допплерометрия кўрсаткичларининг аҳамияти

Abstract

Кириш. Ҳомила ўсишини чегараланиш синдроми (ҲЎЧС) перинатал асоратлар ва неонатал ўлимхавфи билан боғлиқ бўлган долзарб акушерлик муаммоси ҳисобланади. Ушбу ҳолатни эрта аниқлаш перинатал натижаларни яхшилашда ҳал қилувчи аҳамиятга эга. Тадқиқот мақсади. ҲЎЧСни эрта аниқлаш ва прогнозлашда эхографик ва допплерометрия кўрсаткичларининг диагностик аҳамиятини баҳолаш. Материал ва усуллар. Тадқиқотда 90 нафар ҳомиладор аёл иштирок этди: I-гурух — ҲЎЧС аниқланган 30 нафар, II-гурух — ҲЎЧС хавфи бўлган 30 нафар, назорат гуруҳи — нормал ҳомила ривожига эга 30 нафар аёл. Барча иштирокчиларда фетометрия ва бачадон, киндик ҳамда ўрта мия артерияларида допплерометрия ўтказилди. Олинган маълумотлар статистик таҳлил қилинди. Натижалар. ҲЎЧС аниқланган гуруҳда ҳомиланинг қорин айланаси ва тахминий оғирлиги ишончли равишда паст бўлди (p<0,001). Допплерометрия киндик артерияда PI ошиши ва ўрта мия артериясида PI пасайишини аниқлади. Цереброплацентар нисбат (ЦПН) ҲЎЧСни прогнозлашда энг юқори диагностик қийматга эга бўлди (AUC=0,92–1,00). Хулоса. Эхографик ва допплерометрия кўрсаткичларининг комплекс баҳоланиши ҲЎЧСни эрта аниқлаш ва ишончли прогнозлаш имконини беради. Церебро-плацентар нисбат энг сезгир ва специфик прогностик маркер сифатида тавсия этилади.