Пременопаузали ёшдаги аёлларда эндометрий гиперпластик жараёнларининг гормонал профили ва унинг клиник аҳамияти

Abstract

Кириш. Пременопауза даврида эндометрий гиперпластик жараёнлари гормонал регуляциянинг бузилиши, хусусан эстроген доминантлиги ва прогестерон етишмовчилиги фонида ривожланадиган долзарб гинекологик муаммо ҳисобланади. Ушбу ҳолат бачадондан аномал қон кетишлари, ҳаёт сифати пасайиши ҳамда эндометрий саратони ривожланиш хавфининг ортиши билан боғлиқ. Мақсад. Пременопаузали ёшдаги аёлларда эндометрий гиперпластик жараёнларида гормонал профиль хусусиятларини баҳолаш ва турли терапевтик ёндашувларнинг клиник самарадорлигини таққослашдан иборат. Материал ва усуллар. Тадқиқот проспектив, очиқ, клиник-таққослама дизайнида ўтказилди. Жами 120 нафар 40–50 ёшли аёл текширилди ва 4 гуруҳга ажратилди. Барча иштирокчиларда эстрадиол, прогестерон, ФСГ, ЛГ ва пролактин даражалари ҳамда трансвагинал ультратовуш орқали эндометрий қалинлиги баҳоланди. Статистик таҳлил ANOVA ва корреляцион таҳлил усуллари ёрдамида амалга оширилди. Натижалар. Эстроген доминантлиги ва прогестерон етишмовчилиги эндометрий қалинлигининг ишончли ошиши билан боғлиқ экани аниқланди. Персоналлаштирилган терапия қўлланилган гуруҳда гормонал кўрсаткичлар барқарорлашиб, эндометрий қалинлиги меъёрий қийматларга яқинлашди. Эстрадиол/прогестерон нисбати билан эндометрий қалинлиги ўртасида кучли мусбат корреляция қайд этилди (r = 0,64; p < 0,001). Хулоса. Пременопауза даврида эндометрий гиперплазиясини даволашда индивидуал гормонал профиль ва эхографик кўрсаткичларга асосланган персоналлаштирилган ёндашув энг юқори клиник самарадорликни таъминлайди.